孫銘謙你問佢答

Ｑ：球迷的問題　「孫銘」：孫銘謙的回覆

Ｑ：「呢段時間封場冇得踢波，點樣保持自己球技同狀態？」

「孫銘」：「首先我會跟住球隊嘅要求，喺屋企做體能訓練保持狀態，如果情況許可嘅話，會落去附近街場自己玩吓波，或者出街跑吓步。」

Ｑ：「你鍾意打左閘定左翼多啲？」

「孫銘」：「當然係左翼啦！因為自己一向都鍾意參與進攻，同埋防守會踢得無咁放膽，不過其實任何進攻位置我都鍾意，只要唔係後衞就最好喇！」

Ｑ：「你最難忘係邊場球賽呀？來到和富大埔有乜感覺呀？」

「孫銘」：「最難忘嘅比賽係今年代表大埔踢嘅嗰場『亞冠』外圍賽，因為嗰場自己鹵莽而攞咗紅牌，令球隊大敗而回，所以特別難忘。亦都因為呢場波大埔畀到我好溫暖嘅感覺，因為無論教練、隊友、以至球迷，就算我嗰場踢得咁差，佢哋都一路鼓勵我，完全冇責怪我，令我覺得好Warm。」

Ｑ：「現役外援之中你覺得邊位最難應付？」

「孫銘」：「伊高沙托尼，佢速度快之餘又靈活，左右腳都好純熟，而且佢進攻手法多變，又會配合假動作，所以好難知道佢加速嘅時機同埋去邊一邊，好難阻止佢推進。」

Ｑ：「邊位係你偶像，點解？最有信心嘅位置及打法？點樣改善自己嘅弱點？」

「孫銘」：「美斯，因為佢無論變速、轉向、射門觸覺，甚至傳球質素同場上嘅視野，都係世界級，踢出嚟嘅足球亦賞心悅目。最有信心嘅位置可能係右翼？呢個其實自己都未太清楚。打法方面我又無乜所謂，不過當然希望有份上去進攻，至於改善自己方面，我覺得平時練完波同隊友互相切磋及交流，係一個有效嘅改善方法。」

Ｑ：「香港球壇之中你最敬重邊一位前輩？」

「孫銘」：「陳文輝，因為佢對球隊入面嘅年輕球員好照顧，無論喺比賽、練波、定球場外都會睇住我哋，佢好有心機咁教我哋，所以我想講佢對年輕球員嘅成長有絕大幫助。」

Ｑ：「點睇今季自己嘅表現？」

「孫銘」：「我覺得自己今年嘅表現比上年有進步，因為出場機會多咗，但有啲地方依然要落多啲苦功，例如攞波前就諗定下一步要點做，喺呢啲細節位進步，先可以幫到球隊手。」

Ｑ：「最欣賞嘅本地左閘同左翼？」

「孫銘」：「左閘係香港飛馬嘅陳柏衡，上年同過佢喺大學做隊友，知道佢對自己要求好高，兼且好有拚搏精神，速度快得嚟又靈活。左翼就係安基斯，佢速度好快，喺邊路製做好多威脅，但係又唔會淨係死用速度爆人，突破期間經常加入假動作同插花，好難難應付。」