奧雲朗尼都係高手

前富咸球星布拿特因傷退役之後，2013年曾轉打高球，更參加歐巡賽，不過佢玩咗兩年，最後重返葉士域治踢多一陣，翌年就去到地區聯賽做領隊。

其實今年啱啱返英格蘭發展嘅朗尼，都打得有板有眼，曾經拍住北愛爾蘭高球名將麥艾萊一齊打友賽；而前英超神射手舒利亞，退役之後定期出戰職業業餘賽，成績都唔錯。

踢過曼聯、曼城嘅阿根廷「野獸」泰維斯，一樣沉迷高球，佢試過喺效力小保加期間，為咗過高爾夫球癮，去到700公里外嘅球場打波，結果拉傷左腳肌肉，足足抖咗幾個月，激死球會。