無波踢趁機發展副業 加里夫巴利人望高處

有球迷曾經以「威爾斯.高爾夫球.皇馬」諷刺加里夫巴利，話佢將皇馬嘅位置排喺高球之後，事實上佢本人都無否認，最近佢返到家鄉卡的夫城就開了「PAR.59」（59桿）嘅高球主題酒吧餐廳，呢間係繼「Elevens」（11人）足球主題餐廳之後，再喺家鄉擴展餐飲事業。

開設高球主題餐廳

「點解叫59桿？因為打到60桿嘅人已經少之又少，絕對係神級，如果打到59更加不得了，我最佳成績都係67桿……」巴利講起高球已經相當雀躍，而「PAR.59」裏面更設有迷你高球場，完全滿足高球發燒友，「依家環境咁大壓力，我就係想嚟到呢度嘅朋友，可以約三五知己傾下計，唔好飲酒唔緊要，可以推桿輕鬆下。」

加里夫巴利加盟皇馬嗰陣，已經有人畀咗個朵佢，叫「高球手」，呢個朵本身想揶揄吓佢，但偏偏佢又相當接受，「我的確係高爾夫球手，大家無睇過啲相咩？坦白講，我好鍾意呢個花名，踢波係我排第一嘅運動，我會付出最多，同埋將自己最好嘅全投落去；而高球係我嘅嗜好，佢可以畀我跳出足球圈以外，一個冷靜、放鬆嘅地方。」

30歲嘅加里夫巴利出年（2021年）就同皇馬完約，佢受傷咗一排，已經好耐無落場，最近有消息更話皇馬已經「開門」畀佢走，預計夏天可能賣走佢，睇嚟佢如果離開皇馬，轉去打GOLF，考慮開展佢第二個運動生涯都得喎！

加里夫巴利Profile

全名：Gareth Bale

出生日期：1989年7月16日（30歲）

出生地點：威爾斯卡的夫

身高：1米83

體重：82公斤

位置：左翼

現屬球會：皇家馬德里

前屬球會：2006至2007年—修咸頓，上陣40場入5球；2007至2013年—熱刺，上陣146場入42球；2013年至今—皇家馬德里， 上陣149場入78球

國家隊紀錄：2006年起代表威爾斯83次入33球

年薪：1500萬歐元（2019年）