朱志光：唔好畀球員當放暑假
曾兩奪港超最佳教練獎項，並於2006年開始擔任傑志領隊的朱志光，隨着球隊周一作出易帥決定，自加盟後第4度出任「藍鳥」暫代主教練。對於再次執掌帥印，「朱Sir」坦言感覺不算太特別，但明言會盡力讓球隊重回正軌︰「足球要向前看，依家出任暫代教練，我想幫球員恢復信心。我哋之前輸咗幾場波，喺輸嘅過程暴露咗缺點，作為教練有責任去糾正同改善。」
針對能力設計「家課」
「朱Sir」承認，在操練亦被叫停下，如何令球員保持戰意是現時最重要的事︰「現時疫情肆虐，全球任何聯賽嘅教練都冇試過面對好似依家咁嘅情況，點樣調整球員心態係重要嘅一環。各人有各人嘅思想，特別係講到健康呢個咁切身嘅問題。」不過「朱Sir」強調，球員不可有放假的心態︰「依家最重要嘅，係唔好畀球員覺得提早放緊暑假，希望大家遇到困難時識得點去面對。」
傑志於賽馬會傑志中心進行的訓練已宣告暫停，然而「朱Sir」透露會密切關注疫情，亦有為球員設計「家課」讓他們自行操練︰「遇到呢啲情形，變化比計劃嚟得快，如果疫情緩和少少，到時可能會安排球員分批練習，但要避免佢哋逼埋喺同一個更衣室。我哋同體能教練會以球員年紀同個人能力將佢哋分批，再喺速度、耐力等方面為佢哋設計訓練。作為職業球員一定要減少社交接觸，否則件事由健康變唔健康，反而會弄巧反拙！」