狄恩回鄉教波獲掌聲

又有曾經執教過傑志、南華同香港隊嘅教練狄恩消息喇！上個月尾仲喺香港嘅狄恩，原來喺上星期已經重返印尼球壇，出任PSS斯萊曼嘅主教練，第一場由佢正式領軍嘅波就喺上周日踢咗，咁啱對手正係佢曾經執教、並且非常成功嘅萬隆。雖然場波PSS斯萊曼作客輸咗1比2，未能打響頭炮，但主隊都特別為狄恩呢位「前度」，搞咗個簡單而隆重嘅進場儀式，現場球迷不停拍掌歡呼，盡顯狄恩喺印尼球壇嘅江湖地位。