英國防疫招式兒戲 傅家俊或棄戰世錦賽
新冠肺炎疫情在歐美爆發，全球體壇多項比賽包括歐聯、歐霸、英超、NBA、F1等先後煞停，然而桌球界則繼續「波照篤」，4月如期在克魯斯堡劇院上演最高榮譽爭逐的世錦賽，惟香港桌球「一哥」傅家俊（Marco）擔心當地疫情已有蔓延迹象，超過8成會退出今屆賽事。
「英國當地對於傷風感冒向來都係『放棄治療』，佢哋睇醫生都唔使食藥，叫你返屋企食件多士、飲多啲水、瞓吓覺，等佢自己痊愈……」就算最近新冠肺炎疫情嚴重，當地的醫療意識都是不變，Marco不時都向當地的英國朋友了解，對於這樣對抗疫情相當擔心：「我嘅朋友都好無助，因為普遍英國人都覺得呢個疫症就好似感冒。」
吳安儀提早赴英備戰
Marco原本計劃4月4日啟程，出戰下月18日在英國謝菲爾德著名的克魯斯堡劇院開打的世界錦標賽，這也是今個賽季最後1個比賽，不過由於未能掌握及了解當地疫情，為免家人擔心，目前世界排名50的傅家俊很大機會棄戰：「屋企人都真係擔心，其實有80%機會退賽，但都要尊重桌球總會及總教練，我會同佢哋商量一下，暫時仍未通知賽會。」他過去21年職業生涯，曾經18次打入世錦賽決賽周，06及16年更曾闖入4強。至於另一港將李俊威及獲外咭參賽的「四眼Cue后」吳安儀預計都會繼續前赴英國參賽，當中安儀更計劃提早出發。
疫情影響下，Marco練波的時間的確比以往減少，但體能的訓練則可能比過往增加，皆因與兩位愛女在家中活動頻密，他笑言：「囡囡除了online做功課，好多時都要上網睇片做運動，半小時或45分鐘，呢個都係功課嘅一部份，最近嘅周末帶佢哋去行山踩單車，自己體能都Fit咗。」最後，Marco祝願疫情盡快消失，新賽季能否於7月重開仍是未知數：「呢一刻可以做嘅，只有裝備好自己！」