新秀狀元錫安威廉臣終於同「大帝」勒邦占士正面交鋒！只可惜呢位打到識飛一樣嘅「肥仔嘜」未能帶領塘鵝贏波，大部分時間落後之下，結果喺周三上演嘅常規賽作客以109比118不敵有占士獨取40分嘅湖人。
有球評家預測錫安威廉臣成就將會超越「大帝」，今次碰頭「肥仔嘜」打法更加積極希望以證實力，「拆你屋」入樽鏡頭唔少，今場為塘鵝攻入29分夠晒搶鏡，不過35歲嘅勒邦占士點會認輸，全場27投17中包括5個三分波，職業生涯第65次得分「40+」。NBA史上打咗17個球季仍然攞到40分或以上嘅球員之前只得2位，分別係「天勾」渣巴以及高比拜仁，依家加多1個勒邦占士。