on.cc東網直播 小將搶FO戰

標準流浪理文 鍊盡攞尾彩

今日A組分組賽為「例行公事」，標準流浪對理文。流浪於今屆「菁英盃」未嘗一勝，上仗更遭香港飛馬大勝9比3，惟該仗後備上陣的20歲前鋒李鍶泓表示，自史提芬回歸球隊後，他與巴辛在前場產生的化學作用，定必為對手防線帶來威脅，球隊之前攻力不足的問題亦得以解決。

「鍶泓」過往曾在陽光元朗，與理文後衞余煒廉做過隊友，他賽前向對方大笠高帽：「『煒廉』今季累積好多經驗，身型都大隻咗唔少。今場對佢我都係唔好同佢有太多埋身，踢法要多變，多啲畀波走位，因為身體質素未必夠佢嚟。」雖然今仗已成「例行公事」，但他仍視作自己的一個黃金機會：「嚟緊仲有聯賽，教練都會以今場表現嚟判斷畀唔畀我踢，所以都會盡力，我希望可以放啲，用波方面大膽少少，唔好吓吓清走個波。」

另邊廂，理文亦篤定出局，然而今屆7場「菁英盃」均以正選上陣的周家樂揚言，不會放軟手腳︰「我哋其實每場波都好專注咁踢，出唔到線固然覺得失望，但對於我自己嚟講，今屆呢8場『菁英盃』畀到自己好大得着，譬如適應比賽節奏、力量上嘅運用等等。」

理文後衞 周家樂	富力R&F門將 謝家榮	和富大埔中場 何振廷

周家樂期待同好友交手

同時，今場「家樂」更期待與兩位好友潘柏安及彭林林交手︰「潘柏安技術好好，『林林』就有速度，只係身型上輸蝕啲。我會好好利用自己體格同心態較穩定嘅優勢爭取入波，就算冇入波都可以貢獻到助攻！」

富力R&F齊腳 火併和富大埔

目前於B組排第3的富力R&F，在餘下2仗必須全勝，才有機會出線。富力今仗會有基奥雲尼、羅拔圖及白鶴等球員「隔離期滿」歸隊，但門將謝家榮明言不可輕視和富大埔︰「今季兩次對壘我哋贏晒，但過程都唔輕鬆。儘管辛祖離隊攻擊力可能受損，不過佢哋有好多需要提防而有質素嘅球員，譬如金玟基、勞高、中村祐人、陸志豪同陳文輝等。」

對於自己今屆的表現，「家榮」自言有點拘謹，幸好情況已持續改善︰「始終富力係爭標球隊，容許犯錯嘅空間比較細，加上第一次踢規模大嘅球隊，畀自己嘅壓力多咗。好彩半季後都開始知道點樣處理同釋放壓力，依家比季初好好多。」

今屆「菁英盃」和富大埔後勁十足，繼4比4逼和愉園後，上輪更成為「攔路虎」，賽和冠忠南區，令他們未能提早晉級，可見「綠戰士」近況不俗。賽前大埔更收到好消息，新加盟的34歲前大阪飛腳南韓外援金承龍，已解決簽證問題，隨時能夠上陣，另外有傷在身的勞高康復進度良好，亦可候命披甲，整體戰鬥力有增無減。

何振廷入完世界波想添食

至於大埔近期最搶鏡，當然屬陣中一班U22小將，其中與愉園一役，連過數人轟入世界波的何振廷表示：「我都估唔到自己射到呢啲波。上年自己攞住波會好驚，今年攞波係大膽咗。」回想起這球靚波，連「阿廷」自己都感到十分驚訝，但亦總結出場上視野不足的問題：「 隊友經常會提我，叫我要睇清楚場上情況先。」