菁英盃分組賽 2月將軍澳閉門踢
由於康文署因防止社區爆發武漢肺炎決定「封場」，香港足球總會昨日舉行「超聯會會議」，就本地賽事的安排商討。足總主席貝鈞奇會後透露，決定餘下的「菁英盃」分組賽，安排2月內於將軍澳賽馬會香港足球總會足球訓練中心閉門完成。
「由於場地關閉，賽事唔可以喺康文署場地舉行，部分港超隊伍提出訓練中心嘅設施未符合比賽場地嘅國際標準，有啲球隊甚至建議，要求康文署開放場地畀港超隊伍閉門作賽，但目前嚟講，餘下16場『菁英盃』分組賽都會安排喺將軍澳足球訓練中心閉門進行。我哋都希望盡快開放番所有球場，等下個月嘅比賽恢復喺有觀眾席嘅場地上演。」「貝主席」表示。
貝鈞奇補充將會編排16場「菁英盃」分組賽，在2月內上演，決賽則另作安排（據悉為4月下旬），若然球隊堅持在康文署場地進行比賽，仍需與政府進一步商討。至於港超聯賽事則預計下月重開，期間會「開快車」，以避免延長賽期，增大球會開支。問及會否借用香港足球會足球場作賽時，「貝主席」坦言雖然「港會場」是一個標準比賽場地，惟對方未必願意借出球場。
富力R&F總經理：港穗情況一樣
此外，「貝主席」透露主場位於廣州的富力R&F需要暫時搬回香港：「富力基本上同意下月主場賽事改為香港進行，直至中港兩地球場重開，通關冇問題先上番去，因為仲要牽涉自我隔離14日嘅問題，如果球隊上去打完比賽之後要停14日嘅話，問題會好大，所以希望所有球員喺呢段時間唔好返內地比賽。」至於富力在香港的主場安排，「貝主席」透露需視乎哪個球場有空檔，小西灣運動場亦是目標之一。
然而，富力R&F總經理郭能培認為：「成個賽事安排都對我哋好被動，因為唔止『菁英盃』，仲涉及之後嘅聯賽。依家內地政府唔畀舉行大型活動，其實兩邊情況一樣，內地、香港都打唔到比賽，除非大家喺封閉場入面打。但係如果疫情警告取消咗嘅話，我都建議按原訂賽程去番原定嘅場地打，因為香港、廣州都有病例，所以兩邊都唔係絕對安全。」
圖/文：何彥霆、陳焌鏗