作客吉打親歷最震撼畫面

大家好,我係董浩然!今季有幸加盟和富大埔,同呢隊上季聯賽冠軍出戰亞洲球會最高級別嘅「亞冠盃」外圍賽。諗番起我以前都試過以球員身份踢過「亞協盃」,但係冇諗過十幾年後,竟然會以教練身份再參與亞洲賽,實屬榮幸。

呢次係我首次去馬來西亞吉打。第一樣發現嘅嘢,就係當地人對足球嘅熱誠!球隊坐車期間,發現馬路邊嘅LCD大電視,其中一幕就係介紹緊我哋場波。仲有一樣好震撼嘅嘢,就係吉打球迷嘅熱情。我哋球隊巴士未到球場,沿途已有大批球迷等住入場。就算係客隊嘅隊巴,球迷都會夾道歡迎,相當友善。

進到球場後,我先發現成個達魯阿曼球場坐咗近兩萬球迷!而我哋就喺充滿歡呼聲、歌聲下嘅球場入面踢呢場波。講真呀,見到咁嘅畫面,我哋所有人真係有啲壓力。完場後吉打球員去球迷區接受歌聲祝賀時,係我第一次喺球場入面親身感受到咁澎湃嘅氣氛!嗰種彷彿連個身體都畀歌聲震動嘅感覺,對上一次都應該要數番十年前東亞運決賽喇(嗰陣我係睇波啫)。

感謝球迷長途跋涉支持

場波我哋大敗而回,大家一定覺得失望,作為教練團一分子,自己更加責無旁貸。不過比賽已成過去,惟有藉住今場比賽吸取經驗,為之後嘅本地賽事同「亞協盃」做好調整。

講到最後,一定要多謝一班從香港遠道而嚟支持嘅大埔球迷。講真,踢呢場波之前,大家都唔知吉打喺邊,而要去到吉打作客就真係一啲都唔易。球迷你哋都千辛萬苦咁入場支持,只能夠講一句:萬分感激!有你哋嘅支持,球員無論幾攰都好,都一定繼續跑落去。之後就要勞煩你哋落力打氣,等我哋一齊行番上高山!

專欄輪住嚟

和富大埔守門員教練 董浩然