封場困局各隊急謀對策

陳曉明對聯賽叫停有保留

理文主教練陳曉明表示︰「假設比賽暫停超過1個月，而我哋唔郁的話，係會好困難嘅，所以對我哋嚟講，係可以接受唔打比賽，因為依家非常時期，始終健康最重要。作為職業運動員，就算冇球場我哋暫時都要想辦法去維持球員心肺同肌肉嘅體能呢兩個元素，可能去跑步等等，總之要維持番個基本體能！」另外，「陳Sir」亦建議先暫停尚未開賽的「足總盃」，讓球隊先完成正在進行的聯賽或盃賽，但他對聯賽中途叫停則有保留，因為港超目前各隊的對賽成績並不均等，在經過首循環後，並非每隊也同樣跟另外9隊對賽過。

和富大埔昨午如常在廣福球場進行操練，總監馮凱文事前告知球員有關封場的消息，球員得知後感無奈。「馮Sir」坦言「冇辦法」，惟大埔3月要出戰「亞協盃」賽事，球隊必須盡量尋找球場練波維持狀態：「睇吓將軍澳訓練中心開唔開，如果可以就暫時入去練住先。」他指若將軍澳場都閉門，租用如教育大學球場等私家球場，或傑志訓練中心為最後方案。

富力R&F主帥楊正光回應時表示，會密切留意足總的安排，假如賽事短期內不會重開的話，他會與會方研究，希望讓球員先後返港，但一切都要待足總有明確安排。據悉，富力R&F已即日安排球員回港，並會安排留港訓練。

部分球會建議閉門作賽

另外不少球會建議足總安排「閉門作賽」，讓球季能夠順利在5月前完成，標準流浪總監李輝立表示：「好似我哋球隊咁，球員嘅合約大部分都係到5月31日，若果球季唔可以喺5月前完成，咁點算呢？我哋係細球會，畀多一、兩個月合約啲球員，真係搞唔掂！就算當錢解決到，球員接唔接受又係另一個考慮。希望足總果斷啲，聽吓意見安排閉門作賽啦！」

支持閉門作賽的還有冠忠南區，主席陳文俊表示：「政府封場都係擔心人群聚集啫，咁閉門作賽咪唔使擔心囉，無球迷入場嘅話，連大部分場地工作人員，好似票務、保安等等都唔使。希望足總安排到場地閉門作賽，一日踢兩場，戲碼好嘅賽事就安排埋直播，等球季5月前完成埋佢！」據悉傾向「閉門作賽」的除標準流浪和冠忠南區外，還包括香港飛馬和佳聯元朗。

另外，香港籃球總會亦宣布，由於康文署場館關閉，工商盃及健康盃等公開比賽將暫停，而青苗籃球訓練班及地區訓練班亦會暫停，直至另行通知。