占士躋身史上得分王三甲
「大帝」得分超越高比！昨晨ＮＢＡ常規賽，湖人縱有安東尼戴維斯取得31分，作客竟以91比108不敵76人。不過，「大帝」勒邦占士今場獨取29分，ＮＢＡ生涯累積得分達到33,655分，超越高比拜仁打入史上「得分王」三甲，僅次於第2位嘅卡爾馬龍（36,928分）同第1位累積38,387分嘅「天勾」渣巴。
高比出生地「爬頭」
勒邦占士本仗只要拎多18分，就可以超越高比拜仁嘅紀錄（33,643分），結果佢喺第3節中段，憑一記招牌「坦克剷籃」成就呢個歷史時刻，費城主場球迷亦即時起立向佢鼓掌致敬，而最巧合嘅係，費城正正就係高比拜仁嘅出生地。可惜今仗76人眾將演出更勝一籌，兩位主力施蒙斯同杜比亞斯夏里士分別攻入28及29分，全場lead住嚟打，最後76人贏108比91，為湖人送上今季第10場作客敗仗。