夏登達20K里程碑
火箭「大鬍子」占士夏登帶領火箭贏波賀得分里程碑！尋日NBA常規賽，主場嘅火箭憑3位正選交出「雙雙」，主場以139比109大炒木狼，獲32分及12個籃板嘅占士夏登更達成「20K之旅」，個人職業生涯總得分突破20,000分，成為史上第45位進入「20,000分俱樂部」嘅球員。
火箭今場可以話控制戰局，完半場時就領先16分，到第3節更打出一波16比0攻勢，令木狼冇翻身之力，第4節亦變為垃圾時間，最終火箭大勝30分而回，上場輸畀雷霆後迅即反彈。夏登半場錄得11次失誤，係近20年來首人，好在佢都叫將功補過。火箭除占士夏登成為焦點外，「潮韋」韋斯布克亦有30分、6籃板及10個助攻，兩人夾手夾腳協助火箭「升空」。
同日另一仗獨行俠球星當錫亦威風八面，帶領獨行俠主場以109比91擊敗76人。當錫上仗對湖人時不滿表現，當眾撕爛自己件波衫成為熱話，今場就回復水準，取得19分、12助攻及8個籃板嘅全能演出。