東方龍獅擸晒 盧卡斯 辛祖

堅Sir：解決到球隊弱點

昨日東方進行本年首課操練日，兩位新兵均有出席，「堅Sir」表示：「兩位球員我相對都熟悉，佢哋有一定嘅入球能力，呢樣嘢係首選。今個球季我哋仲摸索緊，大家都見到我哋上半季爭一個入波嘅人，而盧卡斯同辛祖呢幾季喺香港，都有個保證喺度。依家球隊入咗『銀牌』決賽，『菁英盃』又排榜首，相信贏多一兩場就好大機會爭冠軍，希望可以喺聯賽追番上嚟。」事實上盧卡斯及辛祖均獲不同球會邀請，最終都選擇東方，「堅Sir」透露原因：「好多時候唔係我哋爭到，係球員自己揀，同辛祖一直保持好好關係，佢哋選擇嚟呢度一定有佢嘅諗法。」問到壓力有否增加時，「堅Sir」坦言：「壓力不嬲都有，應該向好方面諗，要諗吓點樣去好好運用。」

繼和富大埔後再與「堅Sir」合作的盧卡斯稱：「『堅Sir』當年帶我返嚟香港，佢好清楚我嘅特點，加上東方陣容好強，有好多同鄉同前隊友喺度，下半季有信心幫球隊贏得錦標。」他又透露：「好多人搵過我，包括馬來西亞同印尼球會，但我好渴望攞到特區護照，『堅Sir』會幫我達成目標，着香港隊波衫係我嘅夢想。」

至於從和富大埔來投的辛祖表示：「同『堅Sir』傾嘅時候，佢話畀我知喺東方會有一個美好嘅將來，加上有好多隊友都合作過，所以決定同東方簽約。」來到新球會，能夠與去季大埔的「冠軍陣容」聚首一堂，辛祖坦言興奮：「上季同佢哋一齊攞聯賽冠軍，依家又做番隊友，好興奮！個人方面我希望成為神射手！」繼效力傑志後再與盧卡斯合作，辛祖說：「我哋兩個本身好好朋友，大家都有入球能力，對球隊係好事！」

圖／文：陳焌鏗