恭喜「隊長智」榮升「人夫」！和富大埔助教陳旭智將於今年4月17日成家立室，迎娶拍拖4年半的女友LamLam，但其實早在2018年12月29日，他已成功獲當時拍拖3年半的LamLam講「Yes！」
「當日我呃佢話一齊去酒店，參加朋友嘅Party，順便慶祝我哋拍拖3年半。咁班朋友就梗係同我夾好晒啦！求婚過程好順利，但因為大家工作都比較忙，佢係一位護士，啲時間夾吓夾吓，就夾到2020年4月先結得成婚喇。」陳旭智回憶道。
予人印象十分文靜的「隊長智」，與LamLam合影的結婚相，盡顯其調皮一面，他說：「我唔識擺『甫士』，LamLam叻好多，影得靚唔靚呀？呢輯係喺香港影嘅，嚟緊2月去北海道影多輯雪景，因為LamLam好鍾意落雪。」