粗眉哥缺陣湖人燒鬚
「粗眉哥」安東尼戴維斯因傷缺陣令湖人攻力受損，縱使「魔獸」杜域侯活取得10投10中得20分超級發揮，加上勒邦占士今場攻入20分、9個籃板及9次助攻「準三雙」數據，但作客嘅湖人仍以102比105不敵溜馬，7連勝走勢結束。
挾球會史上第3位嘅作客14連勝佳績，湖人今仗開段表現實在唔錯，好可惜安東尼戴維斯缺陣少咗個強大得分點，加上外投未能打出水準成為致命傷，只要勒邦占士下場休息，溜馬就把握搶分機會，大前鋒沙邦尼斯最搶鏡為溜馬攻入26分並得10個籃板，另中鋒端納亦交出16分，最終以3分差距擊敗湖人。外投能力弱成為「紫金兵團」最大問題，有消息指湖人正密謀球員交易，希望可以得到命中率極高嘅塘鵝「飄移射手」列迪克加盟，加強爭霸本錢。
艾頓復出砌唔低快艇
至於上季狀元、效力太陽嘅中鋒艾頓坐完25場禁藥波監正式復出，為球隊作客挑戰快艇。艾頓今仗攻入18分並得12個籃板，可惜太陽另一主將布克因傷缺陣下，被快艇以120比99擊敗。被指經常「輪休」揀波打嘅快艇球星李安納今場亦有上陣，輕輕鬆鬆攻入20分做贏波功臣。