Henry一拖二去釜山撐場
【黃雋謙釜山直擊】一個「大男人」帶住兩個「小女人」可以做啲乜？行街、睇戲、Shopping？非也！香港隊球迷Henry就決定帶太太和女兒遠赴南韓，為出戰東亞盃的香港隊吶喊助威，尤其是港隊即將對陣中國，這場「尊嚴之戰」對決，對Henry一家三口來說更別具意義。
盼女兒為「香港人」自豪
4年前，香港在世盃外圍賽與中國同組，眾港將憑拚搏精神及港人打氣，兩輪均逼和0比0，當年Henry就與新婚太太Angel一同見證這個歷史時刻：「完場嗰刻直頭呆咗，完全冇諗過竟然可以守和中國，為香港人爭口氣！」事隔4年，因一連串社會事件，令港、中兩地關係更複雜，Henry再次成為「港中大戰」的座上客，但同行的除了Angel，還有剛滿3歲的女兒Ashley。「對於我哋嚟講，今次釜山之旅係想一家人去旅行，佢哋又可以陪我睇波，令大家有個開心回憶。」Henry道。
Henry認為，女兒的誕生不但令自己從此睇波之時「多個伴」，還令他更加着緊香港這個家，就算僅僅是足球這一寸微小土地，也要毫不畏懼地堅守：「我想佢知道，Daddy係為一班香港代表打氣，同埋香港雖然喺世界上微不足道，但一直有唔少人為咗呢度而奮鬥，當佢長大後，我想佢可以好自豪咁講佢係一位香港人！」對於今場勝負，Henry坦言為保港隊的尊嚴絕對「唔輸得」：「只要係關乎香港嘅事，身為香港人就算喺逆境之下都唔輸得，作為香港人更要為香港隊而感到自豪！」