金判坤：4年前「港中大戰」最難忘
【何彥霆釜山直擊】Kim Sir仍是「我哋」！10年前東亞運足球項目香港代表隊勇奪金牌，當時帶領港隊一路過關斬將的教練金判坤，雖已回到祖家擔任南韓足協要職，但提起港隊，依舊用「我哋」來形容，更透露4年前「港中大戰」是其職業生涯最難忘的賽事！
適逢「1212」十周年，港隊明日又會在南韓釜山與中國國家隊在東亞盃交鋒，曾在4年前兩輪「港中大戰」領軍的金判坤，坦言與他帶隊時相比，現時港隊人腳、戰術都有很大分別，難以直接比較。不過「Kim Sir」就透露，除了在東亞運決賽勇奪金牌，4年前兩輪「港中大戰」就是他教波以來最難忘的賽事，對於相同戲碼再度上演，他仍會對港隊投下信心一票︰「呢場係一場好重要嘅比賽，我認為我哋（港隊）會有所交代，唔止喺賽果上，而係喺球場上展現出為香港拚搏嘅一面。4年前特別係主場對中國嗰場，場內觀眾同我哋打成一片，雖然身在釜山好難凝聚出相同強度嘅氣氛，但作為代表隊成員，無論身處何地都應該有良好嘅態度。」
喜見昔日小將變大港腳
儘管金判坤在位時曾被批評起用過多入籍球員，但其實當年他也執教過香港青年軍，昔日麾下小將已成長並入選「大港腳」，對此「Kim Sir」亦感到高興︰「當年我教嗰一代係1997、98年出生嘅球員，例如鄭兆均同羅梓駿都開始入選港隊，而之後我都有選過孫銘謙，我想鼓勵吓同激勵一吓佢哋，希望有一日可以喺亞洲盃，甚至喺世盃決賽周都可以見到佢哋。」
金判坤現於南韓足協出任副主席，亦是國家隊遴選委員會委員長，但原來其家人仍在香港定居，「Kim Sir」更透露自己不時低調返港探親，依然心繫這城巿︰「我好掛住香港，從新聞中得知呢度正處於艱難時期，好擔心市民嘅安危。而喺踢完對南韓場波，我去咗港隊下榻嘅酒店同球員見面，同佢哋講無論輸贏都好，都要負起為香港人榮譽而戰嘅責任！」