排名有別搶分目標一樣 富力R&F愉園攻防戰

暫居聯賽次席的富力R&F近況不俗，各項賽事近7場錄得不敗佳績。今午迎戰愉園，只要不敗便能升上榜首，主教練楊正光坦言今季聯賽爭標形勢緊湊，每場比賽都會視作決賽去應付，絕不能輕視對手：「今場對愉園我哋會主動啲，佢哋今季升上超聯之後嘅表現係持續向好，今場一定唔易踢，亦有同球員強調今場波唔可以輕率，要盡全力去比賽！」

楊正光：特別小心加維蘭

光Sir更透露他與愉園的關係：「愉園同我都有啲淵源，好多球員我當年亞少盃都帶過，不過經過咁多年佢哋都有好大進步，但係落到場就要各為其主。當然，我哋都要留意對手外援球員，特別係加維蘭，係一個好有質素嘅前鋒，我哋要好認真去備戰今場比賽。」

北上作客的愉園走勢一般，自10月中旬打和香港飛馬後，聯賽積分未有進帳，輾轉跌到聯賽榜尾二位置。主教練鮑家耀期望今仗能終止頹勢：「對手係一支攻擊力好強勁嘅球隊，今次都準備咗防守戰術去應付，希望球員可以喺作客嘅環境下，可以發揮超水準兼有分落袋！」

愉園大部分球員都未試過北上作客富力，「鮑Sir」表示：「香港同廣州天氣差唔多，香港最近天氣都轉涼，所以天氣唔會有太大影響，反而係要適應場地，加上年輕球員作客經驗唔夠，希望佢哋經過練習之後可以適應到！」他續說：「草地質素望落OK，但係場地好似短啲同埋好闊，對防守嚟講有啲困難，因為對手一拉兩邊就會拉開防線，呢樣嘢球員都會叫小心啲。」