夏登第4次「60+」追平波神

今季被內地封殺嘅火箭，整體表現冇受影響，今場對住鷹隊佔壓倒性優勢，上半場已領先81比52，其中當家球星占士夏登着晒火，首兩節已轟入31分。下半場夏登更加誇張，單節喪入29分，仲多過鷹隊全隊喺嗰節嘅得分。由於勝負已分，取得60分嘅夏登第4節全程做觀眾，加上火箭另一位主力麥里摩亞取得24分及13個籃板球，以158比111贏波之餘，更令鷹隊慘遭10連敗。

公鹿137:96狂勝黃蜂

今次係占士夏登職業生涯第4次單場射入60分或以上，追平米高佐敦，成為NBA史上得分「60+」次數第3多嘅球員之一，僅次32次嘅張伯倫、6次嘅高比拜仁。同日另一場比賽，公鹿主場以137比96大勝黃蜂，公鹿有9位球員得分達雙位數，包括「字母哥」安迪杜甘普取得全場最高嘅26分。