佳聯元朗迎標準流浪搶分騷
「中銀人壽香港超級聯賽」今午假元朗大球場上演「6分波」激戰，由佳聯元朗及標準流浪兩支榜末隊伍交鋒。佳聯元朗雖然早前於「菁英盃」打開勝利之門，惟聯賽戰線尚未「開齋」，今仗誓借主場之利全取3分；標準流浪面對護級對手亦不容有失，務求改善排名盡早脫離降班漩渦！（周六下午2時30分開賽）
法比奧：「6分波」要更進取
目前聯賽6輪過後僅得2分的佳聯元朗，上仗對香港飛馬在下半場久攻不下反告失守，最終以1比2落敗。球員兼助教法比奥坦言對賽果感失望：「飛馬上半場係踢得比我哋好，仲先入波，好在我哋喺完半場前都追和番，到下半場我哋明顯係表現較好一隊，控制戰局之餘亦製造咗好多機會。印象中飛馬下半場第一個中龍嘅攻門，就係佢哋奠定勝局嗰球，不過足球就係咁樣，只要你一犯錯就會得到懲罰。」
「Fabio」續道︰「我哋聯賽嚟緊要對流浪同愉園，希望呢兩場波盡量搶得最多分數。今場『6分波』需要更加進取，只要搵到贏波嘅方法，之後勝利就會陸續有來！」
標準流浪去仗兩度領先下遭和富大埔反勝，教練團認為落敗關鍵在於年輕球員經驗不足，領先後不夠集中，惟有期望從中吸收經驗，避免再犯同樣錯誤。流浪目前排聯賽尾二，今仗面對榜尾的元朗，教練團明言不容有失：「分數反映唔到元朗踢出嚟嘅質素，佢哋幾個外援質素好高。今場係護級大戰，踢完之後都差唔多半季，如果我哋輸畀佢哋就會跌落榜尾，變相下半季搶分壓力就大咗，同好影響球員信心，所以今場波絕對要以3分做目標！」