湖人贏波古斯馬流血淚
湖人主場對雷霆贏得有血有汗！復出冇耐嘅古斯馬防守時被對手打到右眼流血，被迫提早離場，好彩「大帝」勒邦占士再貢獻「三雙」，加上安東尼戴維斯射入全隊最高34分，協助湖人昨以112比107擊敗雷霆，迎來5連勝。
比賽進入第2節不久，雷霆球員巴斯利進攻運球時，為擺脫防守點知佢嘅指尖插到古斯馬右眼，搞到呢位剛復出嘅湖人新星當場流血，無奈退場返回更衣室接受治理。不過湖人整體實力強大，今場輕鬆取得主動權，首節已領先33比28，半場拋開至10分差距；「一眉」安東尼戴維斯全場得到34分、7個籃板及4次助攻，勒邦占士更交出「三雙」25分、11個籃板及10次助攻。雖然雷霆尾段頑抗，完場前1分20秒一度追近落後2分，但可惜難逃輸波命運，湖人延續氣勢錄12勝2負，繼續坐穩西岸「一哥」席位。
安東尼為拓荒者上陣
同日球迷焦點，當然係「甜瓜」安東尼加盟拓荒者，出戰1年多以來嘅首場NBA賽事。着上00號球衣對戰塘鵝，闊別NBA賽場達376天，雖然作客亮相，但安東尼獲得全場球迷的支持歡呼聲，上陣24分鐘攻入10分及4個籃板，表現理想，美中不足係拓荒者喺主將列拿特缺陣下，最終被塘鵝以115比104擊敗，不過安東尼賽後都話收貨：「返到屬於自己嘅地方特別開心，依家最重要可以同隊友好好配合，增強默契。」