港隊開操麥柏倫頭痕

港隊9月作客對被認為全組最弱的柬埔寨，出師不利只賽和對手，及後兩仗不敵勁旅伊朗和伊拉克，現時僅得1和2負。嚟緊主場出擊巴林及柬埔寨，麥柏倫直指前者是一支既快速又有技術的球隊，上輪比賽力挫伊朗足證他們極具威脅，港隊將面臨嚴峻考驗。

面對悲觀形勢，Mixu慨嘆備戰時間不足將令情況雪上加霜：「我哋會盡全力做，但好困難，尤其陣中好多球員上周末仲有比賽，令我哋依家有9個球員受傷，名單仲會有可能改變，但我唔會講名住。」

基奧雲尼拉定筋Show off

Mixu續指，港隊操練雖有3天，但實質缺乏足夠時間進行有效率訓練：「場波星期四，但星期日仲有比賽，球員星期一用嚟恢復，星期三嘅賽前操練練唔到啲咩，即係得1日練，所有人都知係唔夠。」他又期望藉比賽為球迷帶來歡樂：「上場對伊朗，球迷展示強大嘅主場威力。我好感謝球迷嘅支持，同時希望為球迷帶嚟快樂，香港人值得有一場美妙嘅比賽。」

昨日24位球員齊人報到，艾力士、陳俊樂和羅素等外流球員均有入選。今次決選令人感驚喜的是，近期表現出色的富力R&F前鋒基奧雲尼（Gio），以及冠忠南區門將謝德謙均獲重召。基奧雲尼上次獲選已是去年10月對泰國和印尼的兩場友賽。Gio對自己再次入選大感興奮：「我住喺度超過10年，好開心可以再代表香港隊，我會傾盡全力去幫香港隊，畀香港人睇到我有幾愛呢個地方。好期待到時香港大球場坐滿人，一齊為港隊打氣。」

港隊名單

守門員：葉鴻輝（東方龍獅）、

謝德謙（冠忠南區）、袁皓俊（理文）

後衞：羅素 （河北華夏幸福）、丹尼、艾里奧、

羅梓駿、唐建文（傑志）、徐宏傑（梅州客家）、羅拔圖、梁諾恆（富力R&F）

中場：鍾偉強、黃威（東方龍獅）、陳俊樂（廣州富力）、黃洋、鞠盈智（傑志）、

鄭兆均 （理文）、陳肇鈞 （冠忠南區）

前鋒：艾力士 （大連一方）、基奧雲尼 （富力R&F）、

陳廣豪、夏志明 （冠忠南區）、辛祖、孫銘謙 （和富大埔）