AD占士打半場湖人照挫勇士
NBA季前熱身賽大戰，湖人作客去到勇士嘅全新主場，不過焦點毫無疑問落喺「大帝」勒邦占士同安東尼戴維斯（AD）身上，呢對「夢幻組合」第1次合作即刻擦出火花，AD嘅湖人處子戰拎到22分同10個籃板，「大帝」亦有15分同8次助攻，而且佢哋只係打咗上半場就休息，湖人輕輕鬆鬆以123比101輕取勇士。
居里三分波5射僅1中
勇士在杜蘭特及伊古拿離隊後，實力大減，加上奇利湯臣因傷缺陣，史堤芬居里整體命中率僅26%，三分球更全場5射僅1中，個人取得18分及3個籃板。反觀湖人全隊有6人得分上雙，麥基亦貢獻10分及13個籃板，帶領球隊贏出漂亮一仗。
兩大巨星短短嘅合作已經顯示出強大威力，一眾湖人粉絲當然睇得興奮，「魔術手」莊遜賽後喺twitter留言示威：「NBA咁多隊，睇路呀！」湖人教練禾高亦High爆表示：「AD簡直係怪獸！以湖人依家嘅陣容，對手要阻止AD將會非常困難，諗起AD將會交出嘅表現，我真係好興奮，球迷都一定會好興奮！」