專欄輪住嚟：心理壓力難應付過爭位

新一個球季嚟到新環境，所有嘢都要重新適應，尤其係訓練嘅強度同節奏，一開始嗰陣都覺得有啲吃力，有啲跟唔上。不過，依家已經愈嚟愈適應。加盟富力R&F接近三個月，球隊畀我嘅感覺非常專業，所有設施、配套同訓練氣氛都一流，呢啲對一位球員嚟講，絕對係好事。

另外，球隊嘅競爭同壓力都比前兩季喺夢想FC大，「光哥」（即富力R&F主教練楊正光）亦都同我講解過，今季球隊情況比較特別， 因為外援名額嘅關係，守門員位置隨時作出更換，就好似早前嘅第二輪聯賽對東方龍獅咁，所以我要時時刻刻做好準備。

競爭對我嚟講唔係問題，因為都係論表現去公平競爭，不過壓力方面，就覺得自己處理得唔係太好。新球季暫時自覺表現不過不失，但落到場感覺自己有少少綁手綁腳，希望慢慢釋放到呢種心理壓力，享受每一場比賽。

最後，林樂勤同陳梓榮都遇到幾嚴重嘅傷患，希望佢哋盡快康復，可以快啲喺球場再見到兩位。

富力R&F門將 謝家榮