專欄輪住嚟：新球季新挑戰
其實一直以嚟，教練呢個位置，對我嚟講好似好熟悉，又好似好陌生咁。因為我都喺球圈經歷咗20個年頭，由我做球員嗰陣已經喺不同球隊、不同教練身上學到不同嘅足球知識，加上球員時代中後期，已開始報讀初級足球教練課程，讀完之後都好有興趣，所以差唔多退役之前，邊踢邊再報讀有關課程，加上掛靴後有機會喺香港飛馬成為領隊，再加深我對教練／領隊呢個崗位嘅興趣。
所以我做領隊嘅時候，有時間都會上網睇一啲足球教學嘅資訊同方法，同埋唔同嘅訓練模式等等。到咗依家做咗主教練，用喺上網睇資訊嘅時間都多咗好多，真心感受到做一個上心兼稱職嘅主教練，並唔係一件容易嘅事，因為一隊球隊入面有好多人，起碼30幾個職、球員，每個人都有唔同嘅思想、唔同嘅態度，所以喺管理方面，真係需要具備唔同方法同技巧，暫時而言各方面都幾好，嚟緊我哋香港飛馬一定會更加團結、更加強大，我會努力做好每件事，請各位畀一啲時間我，謝謝。
香港飛馬主教練 文彼得