休假心情靚迪布尼派福利
前日到港嘅應屆英超冠軍曼城尋日未有公開活動，一眾職球員獲休假一天，有球員更喺下午外出遊覽。同前一天唔同，部分職球員表現親民，對球迷要求一一滿足，喺「神不知，鬼不覺」下出遊嘅大衞施華同奇雲迪布尼，傍晚回酒店時相當「識做」，迪布尼邊聽電話邊簽名，令在場約20名Fans相當高興。
阿迪達Keep住咁Nice
昨日率先離開酒店嘅係助教阿迪達，佢同前一日一樣親民，一步出酒店就向球迷送上簽名同合照。阿迪達約一小時後折返，部分未獲簽名同合照嘅粉絲期望佢再次「派福利」，雖然佢未有上前，但仍友善地拒絕。呢位助教傍晚再次現身並滿足球迷要求，雖然Fans一度突破防線爭取自拍，見慣大場面嘅佢未有因此面露難色，待合照完畢後先返酒店。
英格蘭中堅史東斯則於下午3時乘車離開，球迷見車停定便跑上前索簽名。有人手持印上其名字嘅球衣，佢都只係尷尬咁豎手指公，未有搖下車窗同眾人互動。外出嘅仲有葡萄牙球星貝拿度施華，顯露疲態嘅佢繞道避球迷「計劃」失敗，同數人合照後，眼見其他粉絲蜂擁而至即跑回酒店躲避。
圖：何彥霆、文：陳焌鏗