史達寧：哥帥嘅必勝心態
隨應屆英超冠軍曼城襲港嘅史達寧，上季憑出色表現成為球隊勇奪國內4冠王嘅核心球員。呢位英格蘭球星今次隨隊訪港出戰「賽馬會傑志中心盃」，百忙中抽空接受本報專訪，大談領隊哥迪奧拿係曼城成功關鍵之外，仲講到溫布萊球場係自己兒時奮鬥目標。
曼城上季前所未有包攬英超、英足盃、英聯盃同社區盾四大錦標，陣中傳射皆精嘅全能攻擊手史達寧，回想自己加盟曼城後嘅成長經歷話：「人長大就會愈嚟愈成熟，我覺得自己加盟球隊後，每年都有長進。細個嗰陣唔鍾意聽勸，經常自以為是，依家我明白虛心聆聽同學習好重要，學習各方面知識，先會令自己變得更強。」
立志做球員同溫布萊有關
上季聯賽交出17個入球、10次助攻嘅驕人成績，亦令史達寧當選「英格蘭足球先生」，其中影響佢最深嘅，非領隊哥迪奧拿莫屬：「哥帥嘅必勝心態，影響包括我在內所有曼城球員，亦係我哋上季成功嘅主因。」史達寧坦言哥帥嘅日常訓練課絕不容易，不過亦係佢好享受嘅環節：「訓練時哥帥唔會畀任何人偷懶，不過崇尚控球在腳嘅訓練模式，係我非常欣賞嘅一點。」
影響史達寧足球生涯嘅，當然唔止哥迪奧拿，佢細細個已經立志成為職業球員，原因之一同一座球場有關：「我喺溫布萊地區附近長大，睇住溫布萊球場重建，當時好想有朝一日可以喺呢座球場、喺朋友同家人面前上陣，最終我好幸運如願以償。」
光鮮嘅球場背後，係溫布萊附近地區惡劣社會環境嘅現實，心繫社群嘅史達寧亦有感而發，計劃喺當地成立青年發展中心回饋社會：「喺倫敦西北部長大，就好似成長喺監獄一樣。唔係每個細路都有機會畀球探發掘，而呢個計劃就係希望幫到當地年輕人，讓佢哋可以遠離各種不良影響。」
文：林卓臻、攝：黃雋謙