伊恩胡禮讚阿仙奴雙箭
曾為阿仙奴贏得1997至98年英超冠軍的英格蘭名宿伊恩胡禮，昨日來港出席贊助商活動，並接受本報專訪並大談現時對「兵工廠」和「三獅軍團」的看法。
阿仙奴去季以第5名完成球季，伊恩胡禮坦言失望：「雖然領隊艾美利喺季初一度造出22場不敗佳績，但季中後防開始力不從心。」貴為「兵工廠」史上入球第二多的Ian又稱，奧巴美揚和拿卡錫迪絕對有力超越自己，不過他承認如果未能為球隊贏得任何錦標，甚麼紀錄也是毫無意義。
豪言三獅5年內可挑戰世盃
90年代英格蘭盛產土炮射手，包括舒利亞、舒寧咸及胡禮等，每位都獨當一面。可是近年愈來愈少「三獅」前鋒能在球隊中被委以重任，胡禮認為這歸咎於上陣機會不足：「年輕球員依家喺球隊冇咩表現時間，一兩場入唔到波可能已被取替。我哋嗰時就算入唔到波，都仲有機會試，慢慢去提升先會保持到入波。」
Ian亦大讚英格蘭現任領隊修夫基：「佢用一套符合球員嘅體系，球員只係做番喺球會嘅角色，展現出可以同強隊匹敵嘅信心。」他更豪言英格蘭5年內有力挑戰歐國盃及世盃冠軍。退役後成為球評家的胡禮，笑言鏡頭前忍笑是最大挑戰：「有次同舒利亞拍住做節目，佢細細聲釋放咗啖胃氣畀我聽到，我差啲忍唔住笑！」
胡禮今次訪港出席活動，不過原來他並非首次來港。早於1995年他便曾為阿仙奴在香港大球場友賽流浪：「仲記得天氣唔單止好熱，連香港嘅球迷都好熱情，不過上次只可返酒店同去球場，今次想去唔同地方！」
球迷：等足21年！
伊恩胡禮昨晚到旺角波鞋街THE FOREST門外出席品牌活動，與近百球迷近距離接觸，期間雖一度下起微雨，但Ian仍一一滿足球迷要求，表現親民。
其中一位球迷Henry帶同已鑲入相框的球衣撐場，他雖未有預先登記，但勝在誠意十足，Ian看見後即吩咐職員讓Henry進入並作交流。Henry專程帶同一件印有「Champion 98」的球衣到場，他表示：「依家心頭大石放低咗！呢件衫等咗21年，嗰個年代去唔到英國，之後試過去主場附近租屋，但都撞唔到佢。」
黃雋謙、陳焌鏗報道