「大帝」連專屬冧巴都讓愛？外國傳媒爆料，湖人球星勒邦占士決定讓出23號球衣畀新加盟隊友安東尼戴維斯（AD），同時有迹象顯示，佢自己就會轉着6號戰衣。呢個決定都幾令球迷震驚，事關23號等同代表占士，佢喺騎士年代已經開始着呢個號碼落場，之後轉投熱火，由於該隊嘅23號被「榮休」，所以改着「6」號，但上季加盟湖人就重回「23」懷抱。據悉聯盟已經收到勒邦占士轉讓球衣號碼嘅通知。
如無意外下月6日正式轉投湖人嘅「AD」，自加盟NBA之後咁蹺一直都係着23號，占士為咗「釋出善意」歡迎呢位新隊友加盟，連心愛冧巴都拱手讓畀佢，認真唔話得。有心水清嘅球迷發現，占士近日喺社交網站上載咗「6號數字」，估計佢來季會重做「6號仔」。
至於占士近日忙緊拍攝嘅電影，搵嚟一大班NBA球星客串，美國傳媒流出拍攝現場片段，疑似睇到「AD」及勇士嘅積蒙格連等球星，喺總決賽重傷嘅奇利湯臣，亦現身撐住拐杖到拍攝場地。