陳志康倡議成立球員工會

香港足球總會昨晚舉行「2019年度第一次會員特別大會」,同時選出新一屆董事會成員,新任主席由副主席貝鈞奇在沒有競爭對手下自動當選,至於與球會有聯繫之董事,則由冠忠南區會長黃良柏,及香港飛馬董事陳志康自動當選。其中由「CowSir」成為「Cow董」的陳志康稱,會致力成立球員工會,在與球會老闆不構成對立下,保障球員待遇和權益。

在一眾新任當選的足總董事中,前港隊代表陳志康正是首位出任董事職位的前球員,「Cow董」表示希望以之前不同的身分,將球圈前線的一些聲音帶入董事會︰「我曾經係球員,之後做過教練同領隊,希望將過去見到嘅嘢,喺董事會畀到一啲意見。可能有人會認為我係『紅褲子』出身,但我睇到嘅嘢會係最前線嘅,我唔係話依家嘅董事睇唔到,而係佢哋未必經歷過,希望我可以畀到多啲有用嘅意見,推動到多啲嘢畀大家。」

「未必係同球會老闆對立」

「Cow董」道出了其上任後一大目標,就是成立球員工會:「有一樣講咗好耐,就係球員工會係需要去發生,球員需要支援,但唔係同球會對立,要去保障球員,因為老闆搞波都想球員安心踢佢隊波,冇理由想球員一路踢波一路做嘢,工會有啲嘢可以令到球會、球員少啲擔心。依家好多17、18歲嘅球員會有掙扎位,屋企人會唔會支持自己踢職業呢?我希望見到嘅係,啲家長支持個仔去做球星,相信如果球員嘅保障好啲,就會多啲家長正面去睇件事,而就算保障好啲都未必係同球會老闆對立。」自陳志康競選董事的消息傳出後,不少圈中人,特別是球員都表示支持,而「阿Cow」曾謂希望以董事的身份,回饋球圈。

新主席貝鈞奇:逐步向前走

新任足總主席貝鈞奇表示上任後不會立刻有太大計劃,傾向逐步向前走︰「嚟緊下季港超基本上會有10隊,希望升降制度同足總好多規章、制度唔好朝令夕改。希望我哋上下可以齊心,提高效率,加強各部門嘅溝通。依家足總新加咗咁多職位,我哋由當初二十幾人,到依家鳳凰計劃之後有成八十幾人,咁應該更加有效率,更加要做多啲嘢。」

此外,與球會無聯繫之董事除霍啟山連任外,亦有程明裕自動當選。由於仍有一個足總董事席位懸空,因此會於9月3日選出新任人選,提名期則為下月5日至25日。

何彥霆報道