「字母哥」擸常規賽MVP變喊包

呢位24歲希臘球星上台攞獎時，感動到喊咗出嚟：「我好感激我嘅隊友，要贏咁多比賽一定要靠團隊力量，每場比賽我哋都齊心合力。另外，亦好多謝教練嘅信任，多謝管理層同老闆…（喊）…多謝佢哋喺我18歲嗰陣就相信我，直到今日。我仲要感謝我爸爸…（喊）…每次落場我都會記得佢嘅教誨，我愛你哋（家人）！」

夏登次席 保羅佐治第3

公鹿係今季NBA常規賽「一哥」，安迪杜甘普交出場均27.7分、12.5個籃板、5.9次助攻、1.3次偷波同1.5次封阻嘅「怪獸級」數據。今次MVP投票結果，火箭前鋒占士夏登排第2位，雷霆前鋒保羅佐治排第3位。

其他獎項方面，獨行俠嘅當錫獲選最佳新人，速龍大前鋒施亞卡姆贏得最佳進步球員、爵士中鋒高拔當選最佳防守球員、快艇嘅路爾斯威廉士3膺最佳第6人、公鹿教練保丹賀沙就當選最佳教練。另外，80年代球場歡喜冤家「魔術手」莊遜及「小鳥」布特則齊獲終身成就獎。