錫安威廉臣做狀元開心到喊
2019年NBA選秀大會昨日展開，杜克大學的超級天才錫安威廉臣（Zion Williamson），毫無懸念中「狀元」，由塘鵝以首輪第1順位收歸旗下。其實塘鵝為迎接威廉臣來投前，已將王牌「一眉哥」安東尼戴維斯放走，換入年輕力壯嘅波爾及恩格林等，擺明要以威廉臣作重心，以青春班底挑戰群雄，難怪喺佢高中狀元嘅一刻，忍唔住流下男兒淚︰「對於成為狀元我覺得難以置信，若果唔係媽媽犧牲自己嘅生活，我肯定唔會獲得呢個成就。」
18歲嘅錫安威廉臣身高2米01，可以出任大小前鋒位置，而且佢速度、力量同技術兼備，進攻同防守一樣出色，早被視為NBA未來巨星，錫安威廉臣上季喺NCAA錄得22.6分、8.9個籃板、2.1次助攻、2.1次偷波同1.8次封阻，有齊晒成為超級巨星嘅條件。
杜克隊友巴列特做「探花」
至於「榜眼」由灰熊揀中嘅莫蘭（Ja Morant）奪得，呢位新人被視為今屆選秀會入面最強控衞，灰熊亦已決定將多年正選控衞康利（Mike Conley）交易去爵士，相信係為莫蘭上位開路。另外，同樣來自杜克大學嘅巴列特（RJ Barrett），則被紐約人相中，成為今年嘅「探花」。
