速龍勝利巡遊爆槍擊4人傷

今季歷史性贏得NBA總冠軍嘅多倫多速龍，尋日喺多倫多市中心舉行勝利巡遊，加拿大媒體估計有接近200萬人上街慶祝，幾乎塞滿晒成個多倫多！不過，今次勝利巡遊發生混亂場面，據報慶祝期間曾經出現槍擊事件，造成4人受傷，幸好傷者並無生命危險，消息指警方已經拘捕3人。

雖然發生不愉快事件，不過一眾速龍球星心情極佳，華裔球星林書豪更即場同家人及好友周杰倫玩視像通話。對於全城上街慶祝，林書豪表示：「實在難以相信，太多激情、太多能量，好感激呢班熱情球迷一直支持球隊。」

至於總決賽落敗嘅勇士亦非常大方，佢哋特別喺《多倫多星報》買咗一個全版廣告，祝賀速龍贏得冠軍，呢個舉動亦贏得外界一致讚賞。