勇士破紀錄西岸5連霸
勁到衝出宇宙嘅勇士連續5季打入總決賽！尋日NBA季後賽西岸決賽Game 4，勇士加時以119比117作客險勝拓荒者，總場數4比0橫掃對手，率先躋身總決賽。勇士連續第5年榮登西岸冠軍，超越80年代嘅湖人西岸4連冠（1982至85年）紀錄，而連續5年殺入總決賽，亦僅次於塞爾特人（連續10年），排NBA史上第2位！
居里格連齊食大三元
勇士今場陣容「讓到出面」，杜蘭特、古辛斯同伊古達拿3位主力因傷缺陣，不過史堤芬居里同積蒙格連就交足貨，齊齊食出「大三元」，「咖喱仔」獲37分、13籃板同11次助攻、格連亦有18分、14籃板同11次助攻，另一「浪花兄弟」奇利湯臣就貢獻咗17分。
主場嘅拓荒者今場背水一戰，上半場憑李安納度勁轟25分，領先對手69比65，之後愈打愈有，一度拋離17分之多，但勇士呢個時刻展現超強後勁，完場前成功追至111平手，到加時後更險勝119比117，總場數贏4比0闖入總決賽，可以慢慢休息等待東岸冠軍嘅出現。