香港飛馬龍門Coach有諗頭 陳振宇以小教大

常言道︰「學海無涯」,這句話在綠茵場上亦無例外。今季加盟香港飛馬擔任守門員教練的陳振宇,球員年代因門將競爭大,早於20歲之齡便開始參與教練工作。今季他更與昔日南華戰友張春暉拍住上,研究如何將五人足球元素,引入十一人足球的守門員訓練及打法上,務求活學活用不斷尋求進步!

現年36歲的陳振宇2003年開始參與教練工作,已成功考取亞洲足協A級守門員教練牌照,他球員年代曾經是南華預備組門將,隨後因競爭太大轉型,今季能夠與昔日師兄張春暉合作,「宇Sir」笑言感覺奇妙︰「好似見番一個好耐冇見嘅老朋友一樣,今年『文總』(香港飛馬領隊文彼得)搵我做教練,話『春暉』(張春暉)都喺度,差唔多相隔10年再重逢,感覺幾得意!」他亦表示,曾於中甲球會梅縣鐵漢擔任守門員教練的張春暉,今季對他幫助很大︰「當年太陽飛馬散班之後,我短暫離開咗職業足球3年,做番一啲青年軍同五人隊嘅工作。所以嚟到呢度,頭3個月都要適應,有時練習會同『春暉』傾吓,大家互相交流心得。」

引入五人足球元素

相比起多年來出任青訓工作,「宇Sir」認為溝通是職業足球最關鍵一環,在門將方面更見明顯︰「教青年軍講求點樣去建立一個球員,如果佢有成績,就會好有成功感。上到一隊,始終成績行先。大家要攞個平衡。其實同守門員嘅溝通最重要,喺青年軍要畀佢哋成長同犯錯,但去到職業層面,就要講解番每一步點解咁做,同點樣做得好,要促成到成件事。我、『09』(梁興傑)、『春暉』、『阿發』(吳駿發)之間會互相溝通,踢完場波大家一齊研究,關係從而建立出嚟。」

作為香港五人足球代表隊教練的陳振宇承認,足總五人足球經理曾偉忠對他的教練成長路影響深遠,並希望可以將一些五人足球元素融會貫通︰「其實現今足球發展趨勢,好多守門員都加入咗五人足球元素,例如迪基亞用腳擋個波,同埋1對1嘅時候,以前係橫身飛撲,依家會擘大脾去擋,又如紐亞同碧福特等門將都開始轉型,因為呢個動作嘅成功率最高。」

宇Sir感激背後兩個男人

除了張春暉外,陳振宇亦對文彼得及陳志康兩位南華舊將心存感激,因為兩人均對他信任及給予機會︰「今季最初好緊張,因為上年係『范Sir』(范俊業)做守門員教練,外界可能會覺得我係新人,甚至未必知道我係邊個,會有比較。因此,當初『文總』打電話嚟搵我,我都考慮咗一段時間,驚應付唔嚟,好多謝佢咁信任我。另外,當年離開咗南華會,『Cow Sir』(陳志康)畀我接觸一隊(太陽飛馬),同何國泉合作,一直以嚟都畀咗好多機會我,我好感激佢。」

圖/文:何彥霆