貝可泓戰術其次最緊要講心

闊別本地頂級聯賽5年，身兼甲組球會公民行政總監的Calvin表示，回歸全因冠忠南區主教練鄭兆聰（Ricky）：「本身有留意香港足球，之前我做評述員，冇做之後時間相對鬆動咗。我同Ricky熟，佢覺得我幫到手，於是問我有冇興趣加入球會。本身幾鍾意冠忠南區呢隊波，佢哋嘅模式同之前公民有啲相似，都係好有心、組織得唔錯嘅球隊。既然時間啱，理念相近，又有好多好似謝德謙、沈國輝嘅老拍檔，所以好快就應承咗Ricky。」

Ricky Sir同球員嘅橋樑

Calvin更以「一剛一柔」來形容自己和「Ricky Sir」的夥伴關係：「我係一個『柔』啲嘅教練，着重點去令球員交出最好表現、將所有潛質發揮出嚟，同埋每場比賽落足力。我覺得就算有幾好嘅戰術，球員唔用心踢，又或者心態唔係咁好嘅時候，都唔會踢到應有水準。」

他續說：「除咗操練、比賽之外，球員場外都會面對唔同嘅問題，有時會有少少失落同迷惘，導致有時做得唔好，我同部分球員熟絡，而且比較擅長同佢哋溝通，所以我嘅角色可以話係主教練同球員嘅橋樑，呢方面幫到Ricky手。」

謝德謙（左）、沈國輝係貝可泓嘅「公民」老拍檔。	冠忠南區（白衫）全力向足總盃冠軍進發。	同鄭兆聰（左）一剛一柔互補不足。

今季在南區與昔日戰友謝德謙、沈國輝再次聚首，Calvin笑言：「同『阿謙』、『阿輝』夾咗好多季，傾傾吓偈都會講番以前啲嘢，例如『阿輝』以前喺公民成日入波喎，我哋會笑佢點解上季冇乜波入，今季助攻又唔多，我哋想佢多啲入波、助攻，睇吓有冇機會喺呢方面做好啲，幫幫球隊手！」

「FM貝」：搵啱外援要有耐性

當日營運公民時，貝可泓曾引入多位具質素的外援，獲球迷封「FM（Football Manager）貝」美譽。問及當中的成功之道時，他認為關鍵在於耐性：「公民班費相對少，唔可以搵完一個外援返嚟，唔啱用就即刻換，所以有時啲外援同我哋諗法唔同，但見佢能力唔太差，就算初嚟香港發揮得唔太好，都會畀機會佢，睇吓季內會唔會進步。」

談到印象最深刻的外援，Calvin透露：「保連奴（即富力R&F翼鋒福保羅）同艾里奧！兩個都係2007年12月嚟香港，都算係我哋早期嘅巴西外援，佢哋嚟到嗰陣都係20出頭，初初都唔係好適應香港，好多人唔睇好佢哋，但踢吓踢吓有好大進步，之後成為長期好幫手。

圖/文：陳焌鏗