雙拿發威！拓荒者76人同拖到搶7
NBA季後賽激到無倫！尋日兩場季後賽4強大戰，西岸拓荒者憑列拿特勁轟32分，主場以119比108擊敗金塊，總場數追成3比3；同日東岸4強就有占美畢拿帶領76人112比101屠殺速龍，總場數一樣係3比3，要等終極第7戰分高下。
之前兩場表現略為跌Watt嘅列拿特，今場終於搵番手感，成功喺出局邊緣挽救球隊，今仗金塊一度拋甩過拓荒者10分，但主隊始終冇放棄，除列拿特外，另一主力射手CJ麥哥林都交出30分，邊隊可以入西岸決賽，就要睇埋「搶7」大戰。
東岸同樣鬥到尾，76人尋日憑占美畢拿嘅25分，加上新星施蒙斯貢獻21分，喺中鋒艾賓特受膝傷困擾下，主場「生擒」速龍，將比賽帶到關鍵Game 7。速龍球星李安納今場射入29分都未能收復失地，不過第7戰佢哋有主場之利。