皮雅斯遭字母哥剃眼眉 公鹿強闖東岸決賽

「字母哥」安迪杜甘普剃名宿皮雅斯眼眉!於昨晨進行嘅NBA季後賽東岸4強Game5,「字母哥」射入20分,加上8個籃板球及8次助攻,帶領公鹿主場以116比91擊敗塞爾特人,並於7場4勝制系列賽,以總場數4比1率先打入東岸決賽!

唔少球評家及球迷都質疑公鹿,揶揄呢支東岸新興勢力只係曇花一現,喺今次季後賽唔知可以走幾遠;當公鹿喺今個系列賽Game1以22分差距不離塞爾特人,「綠軍」名宿皮雅斯搶先向公鹿作出負評,佢喺個人網頁留言「我估計已經玩完!」點知好戲總在後頭,公鹿痛定思痛後連贏4場,將塞爾特人踢出局,足證進攻點點開花嘅公鹿,已為衝擊今屆NBA總冠軍做好準備。躋身東岸決賽,公鹿對手將會是速龍對76人的勝方,究竟表現大勇嘅「字母哥」能否再次殺出血路,就要拭目以待。

艾榮未來去向成焦點

塞爾特人出局,亦意味呢支東岸老牌勁旅可能面臨星散;今個系列賽打唔出水準嘅艾榮,有可能於今夏選擇轉會,不過呢位星級後衞拒絕回應轉會問題,因為仍要調整理出局心情:「我嘅未來去向並冇影響自己發揮,事實上公鹿喺Game2開始就統治呢個系列賽,輸1比4慘敗出局嘅感覺,我從未感受過,依家只想返回波士頓同家人、朋友見面,放鬆心情。」艾榮係聯盟嘅搶手貨,唔少球隊都想將佢收歸旗下,來季會否轉戰西岸,喺湖人同「大帝」勒邦占士再次拍住上成為各界焦點。

周五賽程

8:00am 76人 Vs 速 龍

10:30am 拓荒者 Vs 金 塊

周六賽程

9:00am 火 箭 Vs 勇 士

昨日賽果

公 鹿 116:91 塞爾特人(公鹿勝4:1)

勇 士 104:99 火 箭(勇士領先3:2)

前者主場;體通天下直播