76人贏波艾佛遜最High

76人贏波全靠雙星打出水準，頭2場表現低迷嘅艾賓特打出水準，為球隊攻入33分、10個籃板同5次封波，當中最搶鏡當然係帶波剷入速龍心臟地帶，於對手包圍下表現「大風車」入樽，令到全場費城球迷High到震！至於占美畢拿亦唔失禮，遠射入樽「拆你屋」乜都齊，攻入22分、9個籃板同9次助攻，睇到「戰神」艾佛遜都喺觀眾席興奮到彈起。

完美防守更抵讚

事實上76人對上一次殺入東岸決賽係2001年，當時正是由得分王艾佛遜壓陣，呢位「戰神」今場唔單止入場為後輩打氣，事前仲拍片激勵球員，難怪76人眾將今場特別起勁。「我相信球迷會不停討論艾賓特嘅大風車入樽，或者占美畢拿嘅精彩三分球，但對於我嚟講，最精彩係球隊打出完美防守，只要餘下比賽都可以用心防守，無論對手有幾強都未驚過。」76人教頭布朗似乎對出線充滿信心。

作客嘅速龍其實表現尚可，主將李安納雖然有一次進攻被艾賓特完封，但亦為呢支多倫多球隊帶嚟33分，不過兩大中鋒馬克加素同伊巴卡未能喺艾賓特面前有所貢獻，二人今場合共只得11分，成為勝負關鍵。