作客廣州鍊富力R&F 和富大埔贏即封王
港超王者不離一個「富」字？！聯賽「2哥」富力R&F目前落後和富大埔2分，假若贏波便能超越對手，並以榜首姿態出戰最後一輪賽事，至於大埔全取3分的話，便可提早一輪封王！
富力R&F主教練楊正光認為今仗後備可能成為比賽轉捩點︰「上場對凱景上半場發揮唔太理想，下半場換咗『樂仔』（陳俊樂）同迪布利等攻擊球員後，最終都贏波。若果今場打唔開缺口，我相信我哋嘅後備兵源將會帶嚟變化。」對於今場榜首大戰，「光Sir」誓要全取3分︰「球隊好耐之前已經部署今場比賽，因為大家都知道爭標形勢非常緊湊，嚟到呢一刻許勝不許和，所以需要好強嘅爭勝心。我哋過去一周喺心理上嘅準備比較多，狀態同士氣都非常好。」至於今仗倒戈的陳俊樂表示，對能夠與一起成長的好兄弟各為其主爭冠感高興。
兄弟對決李志堅感恩
和富大埔主教練李志堅昨於賽前記者會成為傳媒焦點，被問及帶領部分「堅家軍」成員，只差一步便能奪冠圓夢，「堅Sir」表示覺得感恩︰「呢場波對我哋嚟講嘅意義同重要性相當大。搵梁冠聰出席記招嘅原因，係佢十幾年嚟以大師兄身份，同我哋一齊行到今日。有機會爭聯賽冠軍，對家亦有幾個同我哋由細到大一齊長大嘅球員，加埋謝家強、伊達，富力可能有一半曾經係我哋嘅主力，我感覺相當特別。好開心我哋培育到咁多球員出嚟，去到其他球隊都可以成為主力，包括『細佬』（梁諾恆）可能會正選上陣，其實呢個『兄弟對決』都唔單止係佢同『大佬』（梁冠聰）兩兄弟，仲有羅港威、陳俊樂，因為佢哋都係一齊長大。」
何彥霆廣州直擊