U22盧梓杰余煒廉拗手瓜
昨日的菁英盃賽前記招中，佳聯元朗、理文均有派出U22球員出席。佳聯元朗的盧梓杰和理文的余煒廉異口同聲表示，渴望協助球會捧走「菁英盃」！
首季征戰港超聯的元朗中場盧梓杰（Billy）在上場準決賽對香港飛馬時，首次獲得正選上陣機會，Billy坦言：「節奏差好遠，踢預備組就算踢120分鐘都無問題，但係上場到60、70分鐘已經好攰，所以體能同身體質素要再練好啲。」
Billy早於上季認識理文後衞陳衍光，自爆經常向他偷師，Billy明言：「如果有機會同佢同場，我都想睇吓自己有冇進步，KO佢就唔諗啦，想贏獎盃返屋企多啲！」
「煒廉」倒戈盯實法比奧
去季助元朗奪得銀牌冠軍的理文中堅余煒廉，點名要小心法比奧：「法比奧除咗喺後場幫到手之外，上到前場都有入球能力，關鍵時候總可以畀到驚喜大家，所以除咗要小心進攻球員之外，亦都好需要留意法比奧後上。」面對這支充滿回憶的球隊，「煒廉」表示：「始終出道嘅時候喺元朗，又攞到銀牌冠軍，好多嘢都係元朗畀我，但去到決賽都唔會再諗，目標係想贏，想幫理文攞冠軍！」