塞爾特人連捷達頓搶Fo
周四進行嘅ＮＢＡ季後賽盡是熱門天下，安迪杜甘保、占士夏登同艾榮3位ＭＶＰ級巨星齊齊Show Time，分別帶領公鹿、火箭同塞爾特人輕鬆贏波，7場4勝制賽事齊齊領先總場數2比0，晉級機會高唱入雲。
東岸一哥公鹿主場迎戰活塞，王牌球星安迪杜甘保上半場受到對方高壓防守，表現未見突出，但「字母哥」第3節突然發力，喺呢一節攻入13分，帶領公鹿一舉將活塞打殘，「字母哥」今場交出26分同12個籃板，最終公鹿以120比99大勝而回。
另一東岸勁旅塞爾特人同樣贏得精彩，上季因傷錯過季後賽嘅艾榮，今場展示出佢對「綠軍」爭奪冠軍嘅影響力，全場攻入37分，再交出6個籃板同7次助攻，帶領塞爾特人主場99比91擊敗溜馬，難怪現場球迷一直高呼：「MVP！」不過隊友達頓今場更加搶鏡，尤其是第4節連環搶分包括反超前嘅三分球，全場貢獻26分，同樣係塞爾特人贏波功臣，賽後達頓興奮咁話：「今場比賽我哋有唔少精彩入波鏡頭，亦好開心喺比賽末段仍然做到出色防守。不過暫時只係領先兩場，我哋一定唔會鬆懈！」
夏登食出大三元
西岸方面，火箭繼續由占士夏登做主角，佢今場攻人32分、13籃板同10次助攻，錄得個人第3次季後賽「3雙」成績，最終主場118比98大破爵士。