里昂日前喺法甲作客輸畀南特1比2，以荷蘭球星迪比為首嘅4名主力突然被踢出正選名單，有指4人因打交被球會內部處分，爆料嘅法國傳媒冇交待清楚事發地點及經過，只知迪比同左閘費蘭特文迪衝突，中場費基亞更激動到同中堅馬些路安東尼奧開拖，結果要被球會「照肺」！另外，教練根斯尼奧亦正式落實會喺季尾離隊，依家排喺聯賽第3位嘅里昂正為下屆歐聯入場券而努力，突然爆出呢啲不利消息隨時影響軍心。