勇士食頭胡居里膺季後賽三分王
NBA季後賽昨晨開打，爭取3連冠嘅勇士打響頭炮，以121比104擊敗快艇，總場數領先1比0。其中當家球星史堤芬居里表現神勇，今仗佢射入8粒三分波，單計Playoffs累積射入386球，超越已退役嘅熱火名將雷阿倫，成為聯盟史上「季後賽三分王」。
今仗係「咖喱仔」職業生涯第91場季後賽，佢交出38分、15個籃板，包括攻入8個三分波，協助勇士拔頭籌。埋單計數，目前佢喺季後賽攻入386球三分波，總數以1球之微壓過雷阿倫，成為NBA季後賽中入得最多三分波嘅球員。更誇張嘅係，雷阿倫用咗171場先達成嘅紀錄，居里只花91場就爬頭，加上「咖喱仔」現年31歲，起碼仲有幾年打，相信到佢退役之時嘅紀錄肯定更加驚人。
祖傑「三雙」 金塊仍不敵馬刺
另一場西岸季後賽，金塊雖有祖傑取得「三雙」——10分、14個籃板球、14次助攻，但仍然以96比101不敵馬刺，馬刺後衞迪羅辛取得18分及12個籃板球，成為贏波功臣。