Hello，大家好，我係香港飛馬守門員張春暉，好開心可以喺本欄目同大家分享一啲自己嘅足球經歷。
好高興闊別香港球壇3年半後回歸呢個大舞台，首先要感激飛馬足球隊會方，多謝佢哋一直冇忘記我，即使我離開咗高水平聯賽咁多年，缺少系統化訓練，喺內地開始咗教練工作，佢哋都依然對我有信心，肯畀機會我重返香港頂級聯賽，等我可以一邊繼續球員生涯，一邊學習更多關於做教練嘅知識。
講番今次復出，我自己都係抱住博一博嘅心態，畢竟3年冇踢職業波，「文總」（香港飛馬領隊文彼得）都擔心我可能會脫節，所以我決定返嚟之後，即刻積極瘦身同做gym。希望用自己以前嘅一啲大賽經驗，同體能彌補比賽狀態、感覺嘅不足，盡快搵番比賽感覺，隨時要我上陣就上陣。
復出回歸港超仲有另一個原因，就係希望透過香港足球總會開辦嘅教練課程去為自己增值，始終我都係「新仔」嚟（執教方面），要有豐富嘅足球知識，先可以教出好嘅球員，希望將來可以為香港球壇出力，培育一批又一批好嘅守門員。謝謝大家！
香港飛馬守門員 張春暉