隱瞞普辛基斯涉強姦案 蠱惑紐約人玩殘獨行俠

今年1月份，紐約人用普辛基斯、小夏達威、哥特尼李爾同布基，交易獨行俠嘅迪安迪佐敦、馬菲斯同丹尼斯史密夫，事後已經爆出小夏達威左腳傷患會有好長手尾，獨行俠被指受騙接收一名「玻璃腳」，勢估唔到連交易重心普辛基斯都孭住單大官司，難怪網民齊齊炮轟紐約人係「無良奸商」。

當錫缺陣 獨行俠照贏雷霆

關於普辛基斯涉嫌強姦案，再有更多內情爆出，二十幾歲嘅女事主指普辛基斯施襲過程中非常暴力，包括多次打佢塊臉，又向佢吐口水兼叫佢做「奴隸」，紐約警方仍就事件進行調查。雖然受到場外是非困擾，獨行俠喺昨晨嘅NBA常規賽仍然贏波，喺王牌新星當錫缺陣下，憑布基轟入25分兼交8次助攻，作客以106比103擊敗雷霆。