雷霆24比0攻勢反勝溜馬
效力雷霆嘅保羅佐治近期狀態重新撻着，就算倒戈舊東家溜馬亦冇情講，昨日呢位NBA球星大發神威獨取31分，當中包括喺第3節為雷霆打出聯盟今季「最猛紀錄」嘅24比0嘅攻擊，最終雷霆主場以107比99擊敗溜馬，常規賽再添勝仗。
雷霆今仗打完首兩節仍然落後，不過轉折點出現喺第3節初段，喺短短嘅6分幾鐘，雷霆打出24比0攻勢，令球隊原本以48比58落後，一下子反先72比58，將溜馬踢落谷底。
24比0嘅攻勢係今季NBA最長連續得分紀錄，亦係雷霆球會史上第2長，僅次於2015年對湖人嘅25比0攻勢。