魯域斯基愈老愈辣！
「德國槍」魯域斯基完美演繹「薑係老嘅辣」！尋日NBA常規賽，魯域斯基帶領獨行俠作客勇士，呢位德國老將拎到今季新高21分，助球隊以126比91大勝而回。現年40歲嘅魯域斯基征戰NBA第21季，盛傳今季完結後就會退役，日前進佔史上得分榜第6位嘅佢，NBA首個入球就係喺勇士主場甲骨文球場拎到，隨住勇士下季「搬竇」，今場亦相信會係魯域斯基最後一次喺甲骨文球場獻技同入波。
「卡爾時代」最大主場敗仗
由於史堤芬居里掛免戰牌，勇士畀獨行俠打到落花流水，輸波後亦將西岸「1哥」之位拱手讓畀金塊。魯域斯基今仗射入5個三分球、全場攻入今季個人新高21分，超新星當錫就交出23分、11籃板同10次助攻嘅「大三元」成績，最終獨行俠充滿說服力地以35分之差大炒勇士，呢場亦係「卡爾時代」勇士嘅最大主場敗仗。魯域斯基賽後勁感觸：「美好嘅回憶、傷心嘅回憶，呢個場館（甲骨文球場）氣氛一流，喺呢度比賽總係快樂嘅，我會永遠記住呢個地方。」
同日熱火作客以113比108擊敗巫師，焦點落喺另一聯盟老將韋迪身上，37歲嘅佢交出20分及9個籃板，協助熱火反彈贏波，熱火亦能夠壓住魔術排東岸第8位，保持出戰季後賽機會。