大帝缺席季後賽
「大帝」勒邦占士今年加盟湖人轟動籃球壇，但昨晨NBA湖人主場對籃網，即使占士搏老命交出「準三雙」，仍以106比111敗陣，宣告湖人正式無緣季後賽，亦係「大帝」自2004-05年球季後，首次冇得打Playoff。
湖人出局網民洗版
其實賽前湖人入季後賽只餘數字上嘅可能，惟「大帝」依然搏到盡，上陣36分鐘交出25分、9籃板、14助攻嘅「準三雙」紀錄，加上麥基轟入職業生涯新高嘅33分，全場比分與籃網咬住上，可惜到完場前24秒湖人落後3分，占士主理關鍵剷籃卻意外跣腳，未能扭轉敗局，最終以106比111見負，勝差落後西岸「老八」馬刺10.5場，意味湖人餘下10場常規賽贏晒都爬唔到頭，宣布連續6年無緣季後賽。
今次係「大帝」近14年來首次未能在季後賽亮相，過去佢喺東岸先後帶領熱火及騎士殺入總決賽，但今季轉戰實力較強嘅西岸即遭「滑鐵盧」，惹來唔少網民落井下石，喺社交網洗版、炮製惡搞GIF及視頻盡情諷刺，更指「湖人無緣季後賽，整個北加州都沸騰」、「MJ（米高佐敦）可以拯救湖人嗎？」，認真唏噓。